حكاية الولية مصالح والواد الوطن

أني ح اجول اللي عندي والأمر لله
أني أصلي كنت ماشية جنب سرايا الباشه
لجيت البلد كلاتها متجمعة
كلاتهم، حتى اللي بناتهم ضديات
إشي أحمد ابن أبويا الشيخ حلمي
وإشي وائل ابن أبويا الشيخ عباس
وخلج ياما، عمالين ينادوا ويعيطوا ع الباشا: طلع لنا البت هويدا بت أبويا الشيخ طه
البت هويدا ما عملتش حاجه
جوم البت شهروزة سحبتني من جفايا وجالت لي جولي يا بت يا مهيسة
شكلك عارفة حاجة، جلت لها: استغفر الله العظيم دي أعراض ناس
جالت لي: ما اني سامعة كلام اني روخرة جولي يا به احسن والختمة ما اجيبلك العسلية تاني
جلت لا يا شهروزة إلا العسلية أني ح اجول
اصل الولية مصالح اللي الباشا كان شاجطها من كلوب كبير جوي في مصر
واتجوزها ع الست هانم الكبيرة بيجولوا انها استغفر الله العظيم عينها من الواد الوطن
وانت عارفة الوطن كان متكلم على البت هويدا بت ابويا الشيخ طه
جالت لي: متكلم عليها، يتكلم عليها ازاي ده انا كنت جطعت له لسانه
جلت لها: لا يا به كان عايز يتجوزها لما يلموا المحصول
البت هويدا بعبطها راحت جالت للباشا على اللي بتعمله الولية مصالح
وارتضح آآآه بجااااااا؟ ارتضح إن اللي بيحصل ده كلاته بعلم الباشا ورضاه
في الأول عمل نفسه ماهواش سامع بس البت هويدا قفشته راح مسلمها لعم عبده عشان يعلمها الادب
هو اللي جال كده، رحت أنا لعم عبده وجلت له: يا عم عبده البت هويدا غلبانه
جال لي: آرف يا بنتي بس ما باليد هيلة والله الستو هانم الكبير ما كانش هيرضى باللي بيهصل ده
الله يرهمه
جلت له: ويحسن إليها هي اللي كانت بتحنن جلب الباشا علينا
ماتت بجهرتها من اللي عمله فيها الباشا
وجال لي إن بلطجية الباشا أخدو البت هويدا ع البدروم
جامت البت شهروزة مصمصت شفافيها وجالت لي: هلبت الكلام اللي سمعته صحيح
جلت لها سمعتي آه؟ جالت لي: بيجولك الباشا بيسرح المقروصة اللي اسمها مصالح
وبيشغلها في بيوت استغفر الله العظيم وبياخد نسبة عليها
وكل سنة مخلفة عيل إيشي أمريكاني إيشي إسرائيلي إيشي صيني
والباشا عارف ومطنش أدام بياخد الأبيج
جلت لها: اسكتي اسكتي، ماش اني رحت اكلمها في السر
جالت لي: وانتي يا ولية مالك ومالي غيرانة مني ليه؟
وجعدت ياختي تترجص لي وتجول لي: كلي في نفسك كلي ح اسيبك كده تهري وتنكتي
الرجالة بيحبوني بيحبوني ياختي وانت لا
جلت لها مالك يا والية بتترجصي لي كده لاه
جوم تجول لي آه؟ اترجص واتجرص وان كان عاجبك
روحي جولي لجوزي خليكي تحصلي البت هويدا
وجعدت انا والبت شهروزة نمصمص في شفافيفنا
البت شهروزة جالت لي: اوعي يا به تروحي تلبخي بالكلام كده وللا كده
احنا مالناش يا ختي دعوة
آه
جوزها وراضي، المهم البت هويدا تطلع
جلت لها تطلع؟ تطلع ازاي بجى إذ كان الباشا بذات نفسه جالك البت دهين مش ح تخرج
جامت سحباني من جفايا وجالت لي اوعاك تجيبي سيرة
بيجولك الولية المصالح هي اللي في يدها كل حاجة
لو الواد الوطن طاوعها ح تطلع البت هويدا
انا سمعت كده خدت ديلي في سناني وطيران ع الواد الوطن
ولا....ولا يا وطن انت فين ياد
لجيته يا جلب امه جاعد حزنان وشايل الهم وجاللي: وانت ايه الجايب الساعة دي يا به
وانا كنت ناجص تهييسك؟
جلت له: جال يا واد ح تغرج نفسك في النجاسة لجل ما البت هويدا تطلع؟
راح مشيع وشه اليمة التانية
جلت له: بص لي هنا يا ولا.... ح تنجس نفسك يا واد؟
ما داهية تكون مصدج الولية المصالح اياك؟
لاه بجااااااااااااااا؟
ما انتاش عارف كانت بتعمل ايه جبل كده؟
ما انتاش عارف انها الباجسة كانت بتسرح في الغيطان وتنجي أيتها جدع
واللي يطاوعها على نجاستها ترفعه سابع سما وبعد ما تمص دمه زي الجراضة
ترميه عضم يا ولا؟
جاللي: واللي ما طاوعهاش عملت فيه آه؟ مش رمتهم في البدرون بتاع الباشا؟
جلت له: إيوة، بس مصيرهم يخرجوا
ولو مخرجوش يا ولا....ح يجابلوا ربهم أطهار
عايز تنجس نفسك يا ولا؟
انت ما علمتش باللي عملته في الواد العراق
والواد فلسطين؟
والواد أفغانستان؟
عايز حالك يبجى زي حالهم يا ولا؟
جال لي: أنا عايز البت هويدا بت ابويا الشيخ طه تخرج
جلت له ح تخرج ان شاء الله
الجدعان كلاتهم واجفين هناك حدا سرايا الباشا
ح يكسروا السرايا اذا البت ما خرجتش
بس اعمل حسابك يا واد يا وطن
لو مشيت في سكة النجاسة مع الولية الباجسة اللي اسمها مصالح
البت هويدا ما حتشوف النور ابدا
اماااااااااااااال؟
لاهو انت لو وجعت في يد الولية دهين ح تسيبك؟
لاه بجااااااااااا؟ لاهو انت ما انتاش عارف انها حداها خبر بان عينك من البت هويدا
وانك كلمت ابويا الشيخ طه عليها؟
جعد يا جلب امه يعيط زي الحريم وجال لي: طب اعمل آه؟
جلت له: زي ما انت كده.....لحدت ما الولية مصالح دهين تتفضح
هي والباشا اللي مشغلها
أمال؟
خليك عفيف يا ولا
اوعاك تنجس نفسك بالطين ياواد
اوعاك والسكة دهين يا واد
اللي مشيوا فيها ما رجعوش يا ولا
اجمد يا واد
وللا عايز العزب اللي حوالينا تجول
الواد الوطن ما جدرش على مرة؟
يبجى تشيل شنبك ده يا واد
وتلبس طرحة زي الحريم
وتجعد تحت رجلين الفاجرة مصالح
تشغلك خدام وعبد وتمص دمك
وبعد ما تدوجك البغاشة
ترميك لسباع السرايا ياكلوك زي ما عملت مع اللي جبلك
جاللي: طيب يا بت يا مهيسة
روحي دلوجت الدنيا بجت المغرب
ألا جولي لي يا به
مين اللي جال لك أني ناوي اماين مع مصالح
جلت له: سمعت وخلاص
جال لي: ح تجولي يا به وللا اخدك على حنطور عينك
جلت له: إيهي عامل راجل عليا جوي
البت شهروزة سمعت كلام كده
بس والختمة الشريفة ما تجيب لها سيرة
احسن ما تجيبليش العسلية

alhlwany